چين سعدت قرين ديوان كيوان ايواننه چقماق اراده ايتدكده ايكى فانوس لعلين و التوندن مرصع جواهر ايله بر كرسى و طشت افتابه زرين اول خدمتده تعيين اولنان خادمان عزت اهين ترتيب و ايينلرى اوزره انواع تزيين ايله اوچنجى دربنده كتوررلر واندن قانونلرى اوزره خاقانك اوتور ديغى تختى اوكنده قورلر و دردنجى دربندك اوزرنده اللى نفر ادم و بر رئيس و معتبر ادم واردر كه كوسلر چلارلر و كنبد مانند سقفدن زنجير ايله اصلش معلق بر چاك واردر كه اول چاكى چالمق ايچون درتيوز خادم تعيين اولنمشدر و بربيوك كمى ديركى كبى چوپى صنعت ايله قرق ادم يره چكرلر و كوس چالنلر نوبتلرين تمام ايتدكده اول چوپى يرندن بوشانديروب زور قوتله اول چاكه كلوب طوقوندقده بر صدا پيدا اولور كه خانبالغ شهرينك جمله خلقى اول صدايى ايشيدوب بيلورلر كه پادشاه عاليجاه تخت عدالتنه جلوس ايتمشدر و اول چوب درايه كلوب طوقونده قده خادملرينه صنعت ايله اولكى مكاننه چكلرلر و خاقان چين اولديغى محلدن قالقوب تخت مثال محفه سنه سوار اوله رق كرسى سلطنتى اوكنه كلنجه چانك مذكور التمش طقوزكره چالنور و خاقان اول التوندن اژدرها پيكر تخته چقوب اوتوردقده بر دخى چالنوب يتمش نوبت اولور و خاقان تختنه جلوس ايتدكده اول دربندلرك كه خاصه خاقانه متعلقدر بيكبار اچيلور و اول قيولرك زاننده هيبت عجيب ايله صدالر و انواع سياستى و مهابتى مشتمل و خوف و خشيتى مشعر اوازه‌لر صادر و ظاهر اولور خانبالغ خلقى اول كوسلر و اول داراى و قيولر اجلديغى صدالردن معلوملرى اولور كه خاقان تخت عدالت عنواننه جلوس ايتمشدر و هر دربندده اون‌سكز عدد ييلان صورتنده اونر قولاج فلاخن يعنى صيان ايچى بارود ايله بلان خلقه خلقه اولوب ترتيب اولنمشدر جميع خلق ديوان پادشاهى كوردكلرنده بر اوغوردن اتش و يردكده طوبلركبى يانق صدالر ظاهر اولوب اندن جميع اهل بلده ستنبه و خبردار اولورلر كه اهل ديوان خاقانك يوزين كورمشلر در و شهر خلقى خاقانك يوزين كورمكه متحسرلردر اول جهتدنكه انلرك ديوانه متعلق بر حاجتلرى اولمدفجه ديوانه دخول ايده‌مز و نقل ايدرلر كه يتمش اتايه دكين ادملر واردر كه خاقان چينك يوزين كورمامشلر درو خاقان سير و تماشاى صحرا مراد ايتسه شهرك جمله خلقى دكانلرينى قيايوب پنهان اولورلر اداب و قانونلرى بودر كه اكر خاقان شكار ايچون صحرايه چقسه اتفاق خلق اوكنده اتدن دوشسه و يا شكارار دنجه